Гомбожавын Мэнд-Ооёо

1952 онд Сүхбаатар аймгийн Онгон сумын Хэмнэгт хэмээх газар төрсөн. 13 настайгаасаа шүлэг бичиж эхэлсэн.

Зохиол бүтээлүүд нь англи, орос, хятад, испани, франц, унгар, бенгал, казах зэрэг дэлхийн 50 гаруй хэлнээ орчуулагдан нийтлэгдсэн.

Г.Мэнд-Ооёо 1990–1996 онд Монголын түүх соёлын хосгүй дурсгал болох “Мигжэд Жанрайсиг” цогцолборыг бүтээн залах хөтөлбөрийг дэвшүүлэн хэрэгжүүлсэн бөгөөд үндэсний монгол бичиг, уран бичлэгийн уламжлалыг сэргээх, соёлын өвийг судлах, хамгаалах үйлсийг манлайлагчдын нэгэн юм.

2002 онд Дэлхийн уран соёлын академиас утга зохиолын доктор цол олгож, байнгын гишүүнээр элсүүлсэн байна.

2014 онд Италийн Чивителла Раниери сангийн тэтгэлэгт хөтөлбөрт уригдаж, Чивителла хэмээх 15-р зууны шилтгээний урланд суралцаж бүтээлээ хийсэн байна.

2014 оны 9-р сард Румын Улсын Крайова хотод болсон Дэлхийн яруу найргийн наадамд дэлхийд хүлээн зөвшөөрөгдсөн 50 гаруй яруу найрагчдаас тодорч Михай Эминескугийн нэрэмжит Олон улсын яруу найргийн наадмын Гранд буюу тэргүүн шагнал хүртжээ.

2015 онд Монгол Улсын Ерөнхийлөгчийн зарлигаар Монгол төрийн эрхэм дээд шагнал - тэргүүн зэргийн одон “Чингис хаан” одонгоор шагнагдсан анхны зохиолч юм.

Яруу найргийн “Утгын болор сүм” (1997), “Тэнгэрийн хаяанаас нүүдэлчин айсуй” (2002), “Хэсэг цагаан манан” (2010), “Гэрэлтэх агшин бүр” (2010); шилмэл яруу найргийн дээж “Он цагийн хүрд” (2016) хүүрнэл “Алтан-Овоо” (1993, 2002, 2007, 2008, 2010) болон “Гэгээнтэн” (2012), “Шилийн богд” (2015) романууд, “Шармаань” тууж (2020), “Гол ус тунгалагших цаг” (2015), “Оюун санааны хээр тал”(2016), “Оршихуйн гэрэлт хүрээн дотор” (2018), “Цагаан манан, гэгээн гуниг” (2020), эссэ нийтлэл, баримтат уран бүтээлийн чуулганы 60 гаруй ном хэвлүүлсэн.